Item inquiratur a quolibet plebano, si habet statuta sinodalia ultimo confecta, et i n s i n o d o in licencia pronunciata, et utrum ea exequantur et in singulis mensibus ad minus semel perlegant et ipsorum sciant continenciam. Item domini visitatores conscribant omnes plebanos non residentes in suis ecclesiis, et causas, cur non resident, inquirant. Item inquirant diligenter de plebanis et presbiteris omnibus, si aliqui ex ipsis sint lusores tasserum uel in alea, uel contenciosi et tabernarii tales sint. Item si reuerenter visitent infirmos cum sacramentis procedente candela cum vexillo et campenula. Item si predicti aliqui usuras exercent uel aliqua alia lucra illiciti similiter exercent. Item si iniungunt penitentibus penitencias pecuniales uel missarum appreciandarum. Item domini visitatores de aliis defectibus inquirant, qui supra non conscripti secundum industriam et circumspeccionem ipsis a deo concessam. Item domini visitatores expedito officio sue visitacionis conscribant omnes defectus, quos invenerint in aliqua ecclesia in plebano vel in ministris Ecclesie, et conscriptos et post hoc tantum correctos et concordatos nihil obmittendo dirigant domino archiadicono per nuncium fidelem, derelictis circa se copiis propter pericula; quas venientes ad futuram sinodum celebrandam reportent similiter archidiacono, ut concordet prima scriptura cum copiis, ne vicio scriptoris aliquid obmittatur. Forma conscribenda talis est. N. plebanus talis Ecclesiae inventus est ex testimonio sex testium, uel octo fide dignorum, in concubinatu publico seu oculto 5, 6, 7. uel decem annis uel pluribus; prout fuerit rei veritas, ita scribatur, et tot pueros procreauit. Item tot pueri sine baptismate mortui sunt per negligentiam plebani uel vicariorum. Item tot, puta tres uel quatuor infirmi mortui sunt sine confessione et sacramentis; et de aliis contentis in articulis per modum interrogatoriorum supra descriptis.